Бишкекте бош орундардын жарманкеси өтүп жатат, анын ачылышында эмгек министри Равшанбек Сабиров сөз сүйлөдү. Жарманкеге 60 ишкананын ар кандай тармактарындагы 5 миңге жакын бош орундар коюлган.
Министр белгилегендей, жарманке калкты иш менен камсыз кылууга көмөктөшүүгө жана эмгек рыногунда атаандаштыкка жөндөмдүүлүктү жогорулатууга бардык шарттар түзүлгөн. Ал кесипке алгачкы кадамдарын таштаган университеттин бүтүрүүчүлөрүнүн катышуусуна көңүл буруп, жарманке алардын ийгиликтүү карьерасынын башталышы болот деген ишенимин билдирди.
«Coca-Cola», «Бишкексүт», «Мегаком» ЖАК, «Бай Таш Групп» ЖЧК, «Элдик банк», Мбанк, Hyatt Regency Bishkek, «Кыргыз темир жолу» мамлекеттик ишканасы сыяктуу алдыңкы компаниялар да өз кадрларын издөө максатында иш-чарага катышты.
Белгилей кетсек, эмгек жарманкеси — бул жөн гана жумуш табуучу иш-чара эмес, бул жаштар менен келечек ортосундагы көпүрө. Мындай иш-чаралар аркылуу иш берүүчүлөр менен жарандардын ортосунда түз байланыш түзүлүп, өлкөдөгү жумушсуздук деңгээлин кыскартууга чыныгы салым кошулат. Статистикага ылайык, мурунку жарманкелердин аркасында 200—300гө жакын адам кыска убакытта жумушка орношуп келген.
