Расмий түрдө. Сүйүнбек Касмамбетов мамлекеттик катчы кызматынан бошотулду

Кыргыз Республикасынын Президенти Садыр Жапаров кол койгон Жарлыкка ылайык, Кыргыз Республикасынын Конституциясынын 70-беренесинин 1-бөлүгүнүн 9-пунктуна, 71-беренесине ылайык Кыргыз Республикасынын Мамлекеттик катчысы Касмамбетов Сүйүнбек Сапарбекович башка ишке өткөндүгүнө байланыштуу ээлеген кызмат ордунан бошотулду. Бул тууралуу президенттин маалымат кызматы билдирди.

Эске салсак, Сүйүнбек Касмамбетов бүгүн, 15-майда кызматтан кетүү боюнча арыз жазган. Анын айтымында, анын кетиши жаш курагына байланыштуу; мамлекеттик кызматта 43 жыл иштеген.

Сүйүнбек Касмамбетов 1960-жылы 8-апрелде Нарын шаарында туулган.

Билими жогорку: 1987-жылы Кыргыз мамлекеттик университетинин тарых факультетин бүтүргөн.