Урмат Карыбаев Бишкек шаарынын башкы архитектору кызматынан бошотулду.
Ал Фейсбуктагы баракчасы аркылуу коштошуу сөзүндө кызматта турган үч жыл ичинде борбор калаанын архитектуралык көрүнүшүн өнүктүрүү боюнча маанилүү долбоорлорду ишке ашырууга жетишкенин белгилеп, ишеним көрсөткөн кесиптештерине жана өлкө жетекчилигине ыраазычылык билдирди.
Урмат Карыбаев бул кызматты 2022-жылдын апрель айынан бери аркалап келген. Ал 2023-жылы жерди мыйзамсыз берүү боюнча козголгон кылмыш ишинин алкагында УКМК кызматкерлери тарабынан кармалган. Кийинчерээк бул иш жабылган.
Бишкектин жаңы башкы архитектору болуп Медербек Кыдырмаев дайындалды. Буга чейин «Бишкекбашкыархитектура» башкармалыгынын жетекчисинин орун басары кызматын аркалап келген.
