13:18, 13 июня 2025, Бишкек - 24-kg.com
«Intervision- 2025» музыка сынагына катыша турган өлкөлөрдүн тизмеси жарыяланды. Бул тууралуу аталган иш-чаранын басма сөз кызматы билдирди.
«Бул жылы сынакка 20 мамлекет катышат: Азербайжан, Беларусь, Венесуэла, Вьетнам, Египет, Индия, Казакстан, Катар, Кытай, Колумбия, Куба, Кыргызстан, БАЭ, Россия, Сауд Аравиясы, Сербия, АКШ, Тажикстан, Өзбекстан жана Түштүк Африка», — деп айтылат маалыматта.
Биринчи эл аралык музыкалык «Интервидение — Алтын ачкыч» конкурсу 1965-жылы Чехословакияда өткөн. 1977-жылы Польшанын Сопот шаарында жыл сайын өткөрүлүүчү сынак «Интервидение» деп аталган. 2008-жылы Сочиде «Беш жылдыз. Интервидение» сынагы өткөн.
Интервидение сынагы 2025-жылдын 20-сентябрында Москва шаарында өтөт. Баш байге 300 миң евро.
Эскерте кетсек, улуттук тандоонун жеңүүчүлөрү Бек Исраилов, Миңжашар Мурзаев жана Азат Раимбердиевден турган «Nomad» триосу «Интервидение» музыкалык сынагына Кыргыз Республикасынын атынан катышат.