«Нарынгидроэнергокурулуш» ААК уставдык капиталын 150 миллион сомго көбөйтөт. Каражат бөлүү боюнча тиешелүү буйрукка министрлер кабинетинин башчысы Адылбек Касымалиев кол койду.
Каржы министрлигине Жогорку Кеңештин Бюджет, экономикалык жана фискалдык саясат боюнча комитети менен макулдашуу боюнча каржылоону камсыздоо тапшырылды. Ведомство ошондой эле 2025-2027-жылдарга республикалык бюджет жөнүндө мыйзамга түзөтүүлөрдү даярдоодо тактоолорду карашы керек.
Энергетика министрлиги ишкананын уставдык капиталын көбөйтүү жол-жобосун жүргүзөт. Ал эми Каржы рыногун жөнгө салуу жана көзөмөлдөө кызматы «Нарынгидроэнергокурулуш» ААК акцияларынын кошумча эмиссиясын каттайт.
Аталган компания өлкөнүн гидроэнергетика тармагында стратегиялык мааниге ээ экендиги белгиленген. Колдоо көрсөтүү чечими Кыргыз Республикасынын энергетикалык инфраструктурасын чыңдоого багытталган.
