Буга чейин Бишкектин мектептерине видеокөзөмөл камераларын сатып алууга тендер жарыяланган. Бул тууралуу борбор калаанын шаардык кеңешинин социалдык маселелер боюнча туруктуу комиссиясынын жыйынында вице-мэр Виктория Мозгачева билдирди.
Анын айтымында, жай мезгилинде административдик-аймактык реформанын алкагында шаарга кошулган мектептерге видеокөзөмөл системасы орнотулат.
«Биз борбордогу бардык мектептерди кыдырып, балдар көп чогулган жерлерге же камералар иштен чыккан жерлерге кошумча жабдыктарды орнотуу керектигин жаздык. Сметаны даярдап, шаардык кеңеш колдоду», — дейт Виктория Мозгачева.
Мамлекеттик сатып алуулар порталы маалымдагандай, 17-июнда борбор калаанын билим берүү башкармалыгы Бишкектин мектептерин бетти тааныган сырткы видеокөзөмөл камералары менен жабдуу кызматын сатып алууга тендер жарыялады. Дээрлик 24,6 миллион сом бөлүү пландаштырылууда.
Жеткирүүчүлөрдүн сунуштары 2-июлга чейин кабыл алынат.
Буга чейин 2025-жылы шаар мектептерине видеокөзөмөл камераларын орнотууга бюджеттен 46 миллион сом каралганы айтылган.
