Өзгөчө кырдаалдар министрлиги аба ырайына байланыштуу шашылыш билдирүү таратты.
Ага ылайык, 26-июндан 27-июнга чейин туруксуз аба ырайына жана күтүлүп жаткан локалдык нөшөрлүү жаан-чачынга байланыштуу республиканын тоолуу жана тоо этектериндеги райондордо сел жүрүшү мүмкүн. Ошондой эле дарыяларда суунун деңгээли көтөрүлүшү ыктымал.
Буга байланыштуу Өзгөчө кырдаалдар министрлиги жарандарга төмөнкүлөрдү эскертет:
сел коопсуздук эрежелерин сактоо;
арыктарды тазалап, жээгин бекемдөөнү жана таштанды таштабоону;
турак үй жайгашкан жерде жаан суулары агып өтүүгө ылайыкталган арыктын болушун камсыздоону;
үй же сарай салууда жана эгин айдоодо сел жүрүү кооптуулугу бар тилкелерге жакын эместигине өзгөчө көңүл бурууну;
сел учурунда дароо коопсуз жайга кетүүнү;
мүмкүнчүлүк болсо үйдөгү свет, суу, газды өчүрүүнү.
