Илим, жогорку билим берүү жана инновациялар министрлиги 2025/26-окуу жылына Кыргызстандын ЖОЖдоруна кабыл алуунун босого баллдарын бекитти. Бул тууралуу 24-kg.com агенттигине аталган мекемеден билдиришти.
Ведомствонун маалыматы боюнча, босого көрсөткүчү негизинен мурунку жылдардагыдай деңгээлде сакталды:
Негизги тест — 110 балл;
Предметтик тесттер — 60 балл.
Бирок кээ бир аймактар жана адистиктер үчүн негизги тесттин босого баллы башкача:
педагогикалык билим берүүнүн багыттары/адистиктери үчүн — гранттык орундар үчүн 130 балл жана контракттык бөлүмдөр үчүн 115 балл;
саламаттыкты сактоо тармагындагы багыттар/адистиктер үчүн — гранттык орундар үчүн 120 балл жана контракттык бөлүмдөр үчүн 110 балл;
айыл чарба жана айыл чарба илимдеринин багыттары/адистиктери үчүн — гранттык орундар үчүн да, контракттык бөлүмдөр үчүн да 100 балл.
Төмөнкү багыттар боюнча предметтик тесттердин босогосу бирдей — 60 балл.
I жана II топтогу майыптарды, бала кезинен ден соолугунун мүмкүнчүлүктөрү чектелүү адамдарды, жетим балдарды жана ата-энесинин камкордугусуз калган балдарды кабыл алуу үчүн медициналык жана фармацевтикалык адистиктерден тышкары, негизги тестирлөө босогосу 90 баллды түзөт (гранттык орундар жана контракттык окуунун бардык формалары үчүн).
Эске салсак, 2012-жылдан тарта ЖРТ менчигинин түрүнө карабастан республиканын бардык ЖОЖдоруна кабыл алууда милдеттүү болуп калды. Бирок тесттин жыйынтыгы талап кылынбаган адистиктердин жана багыттардын тизмеси бар (дене тарбия жана спорт, маданият жана искусство).
