Камчыбек Ташиев күзөт жана коштоо департаментине техникаларды тапшырды

15:24, 19 августа 2025, Бишкек - 24-kg.com

КР Жазаларды аткаруу мамлекеттик кызматынын Күзөт жана коштоо департаментине 81 млн сомго заманбап жабдуулар берилди. Бул тууралуу ЖАМКнын басма сөз борбору билдирди.

Иш-чарага министрлер кабинетинин төрагасынын орун басары — УКМК төрагасы Камчыбек Ташиев жана ЖАМК төрагасы Чыңгыз Кожошев катышты. Техникаларды Камчыбек Ташиев Эгемендүүлүк күнүнүн 34 жылдыгына арналган иш-чаралардын алкагында президент Садыр Жапаровдун атынан тапшырды.

Берилген заманбап техникалардын баасы 81 млн сомду түзөт. Анын ичинде:

14 даана атайын техникалар;

191 видеобайкоо камералары;

9 квадрокоптерлер (дрондор);

450 боди камералар (видеорегистратор)

Ташиев ЖАМК кызматкерлери үчүн материалдык-техникалык базаны чыңдоо боюнча тиешелүү шарттар мындан ары да түзүлөөрүн, анын ичинде аталган кызматтын баардык кызматкерлерин турак-жай менен камсыз кылуу зарылчылыгын белгиледи. Ал соттолгондорду социалдаштыруу боюнча активдүү иштерди улантууну тапшырып, ошондой эле кызматкерлердин арасында коррупциялык көрүнүштөргө жол бербөө керектигин эскертти.

Жаңы жабдуулар жана атайын техникалар Күзөт жана коштоо департаментинин ишин жакшыртып, кызматкерлердин коопсуздугун камсыздап, мекемелерде тартипти жана көзөмөлдү күчөтөт.